周秀娜樂被富商包「幾好喎！我都唔介意」

周秀娜（ Chrissie）噚日帶住新 8模 Hidy、 Suki、 Vibeke、 Betrys、 Rika、 Mia、 Jeana、 Hazel喺銅鑼灣行內衣騷， Chrissie果然有大師姐風範，做壓軸嘉賓兼只係着住件 push up bra加條牛仔短褲行出場擺幾個甫士就收工，但 8模着完內衣又騷 see through睡衣換足 4套衫兼跳晒舞，都係收 6位數字酬金，仲要 8個人分，真係同人唔同命。

Hidy着住件透視睡衣，見埋條 T-back底褲，真係博到盡。

Suki（左）同 Vibeke着內衣行騷，睇嚟青春活潑，迷死唔少宅男。

胸口紅咗撻撻

Hidy着嗰件 see through睡衣入面仲着咗條 T-back底褲，相比之下 Chrissie錫身好多，點知佢話：「個客要求我咁着，我都有着底褲，只係大家睇唔到。」唔知 Chrissie男友鍾意佢着乜款嘅內衣，定係乜都唔着最好呢？ Chrissie話：「點可能唔着呀，我着乜佢都鍾意。」講講吓見到佢個胸口紅咗一撻撻， Chrissie就抵死咁講：「做運動多操勞得滯。」嘩！個胸做乜運動？ Chrissie：「做 gym囉！」

人紅是非多，有雜誌報道話有富商出百萬包起 Chrissie本寫真嘅宣傳費， Chrissie聽到就話：「幾好喎！我都唔介意，不過都冇呢回事，話有富商都講咗好耐，都冇出現過，真係出現先算啦！」另外， 8模就抬舉師姐 Chrissie係全場最性感嘅一個喎。